ek puraana khat mila aaj mujhe
tumne di hui kitaab mein chipa hua
kagaz peela ho gaya tha
sihaayi feeki ho gayi thi.
par aaj bhi uss khat mein
tumhara chehra saaf nazar aa raha tha
har ek lafz tumne likha hua
aankhon se hokar dil mein utar raha tha
theek waise hi -
jaise kayee saalon pehle hua tha.
aaj bhi main waise hi muskurayi
jaise tab muskurayi thi.
kuch saalon baad
sihayi aur feeki ho jaayegi
shayad likhe shabd mit jaayenge
lekin jazbaat waise hi rahenge
tumhari meri prem kahani ki gawahi dete…
Return to Main Page
